ಪ್ರಕೃತಿ ಬೆಳಗಾವಿ ಸುದ್ದಿ : ಓ ಮುದ್ದು ಮಕ್ಕಳೇ ತಂದೆ-ತಾಯಿಯರ ಕನಸುಗಳನ್ನು ಕಾಪಾಡಿ
ಇಂದಿನ ಕಲಿಯುಗದ ಜಗತ್ತಿನಲ್ಲಿ ಮಕ್ಕಳು ಮತ್ತು ಯುವಕರು ಯಾವ ದಾರಿಯಲ್ಲಿ ಸಾಗುತ್ತಿದ್ದಾರೆ ಎಂಬ ಪ್ರಶ್ನೆ ಪ್ರತಿಯೊಬ್ಬ ತಂದೆ-ತಾಯಿಯ ಮನಸ್ಸಿನಲ್ಲಿ ಮೂಡುತ್ತಿದೆ. ಮಕ್ಕಳನ್ನು ಚಿಕ್ಕವರಿಂದ ದೊಡ್ಡವರಾಗುವವರೆಗೆ ಬೆಳೆಸಿ, ಒಳ್ಳೆಯ ವ್ಯಕ್ತಿತ್ವದೊಂದಿಗೆ ಸಮಾಜದಲ್ಲಿ ಗೌರವದಿಂದ ಬದುಕುವಂತೆ ಮಾಡುವುದು ತಂದೆ-ತಾಯಿಯ ಮಹತ್ತರ ಜವಾಬ್ದಾರಿಯಾಗಿದೆ. ಹೆಚ್ಚಿನ ತಂದೆ-ತಾಯಿಗಳು ತಮ್ಮ ಮಕ್ಕಳ ಭವಿಷ್ಯಕ್ಕಾಗಿ ತಮ್ಮ ಬದುಕನ್ನೇ ಸಮರ್ಪಿಸಿ ಹಗಲು-ರಾತ್ರಿ ಶ್ರಮಿಸುತ್ತಾರೆ.
ಆದರೆ ಇಂದಿನ ಮಾಯಾಜಾಲದ ಜಗತ್ತಿನಲ್ಲಿ ಕೆಲ ಮಕ್ಕಳು ಆಕರ್ಷಣೆಗೆ ಮರುಳಾಗಿ ತಪ್ಪು ದಾರಿಯತ್ತ ಸಾಗುತ್ತಿರುವುದು ಕಂಡುಬರುತ್ತಿದೆ. ಮಕ್ಕಳೇ, ಒಂದು ಕ್ಷಣ ಯೋಚಿಸಿ — ನಿಮ್ಮ ಬಗ್ಗೆ ಅತ್ಯಂತ ಹೆಮ್ಮೆಪಡುವವರು ಯಾರು? ನಿಮ್ಮ ತಂದೆ-ತಾಯಿಗಳೇ. “ನನ್ನ ಮಗ ದೊಡ್ಡ ಅಧಿಕಾರಿ ಆಗಬೇಕು, ನನ್ನ ಮಗಳು ಒಳ್ಳೆಯ ಹುದ್ದೆ ಪಡೆದು ಸಮಾಜದಲ್ಲಿ ಗೌರವದಿಂದ ಬದುಕಬೇಕು” ಎಂಬ ಕನಸು ಪ್ರತಿಯೊಬ್ಬ ತಂದೆ-ತಾಯಿಯ ಮನಸ್ಸಿನಲ್ಲಿ ನೆಲೆಸಿರುತ್ತದೆ.
ಆ ಕನಸುಗಳನ್ನು ನನಸಾಗಿಸುವ ಹೊಣೆಗಾರಿಕೆ ಮಕ್ಕಳದ್ದೇ ಆಗಿದೆ. ತಂದೆ-ತಾಯಿಯ ಆಶಯಗಳನ್ನು ಗೌರವಿಸಿ, ಅವರ ಮಾರ್ಗದರ್ಶನದಂತೆ ನಡೆದುಕೊಂಡರೆ ಅದು ಜೀವನದ ದಾರಿದೀಪವಾಗುತ್ತದೆ. ಆದ್ದರಿಂದ ಮಕ್ಕಳೇ, ಕ್ಷಣಿಕ ಆಕರ್ಷಣೆಗಳಿಗೆ ಮರುಳಾಗದೆ ನಿಮ್ಮ ಜೀವನದ ಗುರಿಯತ್ತ ಗಮನ ಹರಿಸಬೇಕು.
ಶಾಲೆಯ ಮೊದಲ ತರಗತಿಯಿಂದ ಹಿಡಿದು ಕಾಲೇಜು ಹಾಗೂ ಡಿಗ್ರಿ ಮಟ್ಟದವರೆಗೆ ನಮ್ಮನ್ನು ಶಿಕ್ಷಣದ ದಾರಿಯಲ್ಲಿ ನಡೆಸುವವರು ಗುರುಗಳು. ಗುರುಗಳ ಮಾರ್ಗದರ್ಶನವಿಲ್ಲದೆ ನಾವು ಶಿಕ್ಷಣವನ್ನು ಪಡೆಯಲು ಸಾಧ್ಯವಿಲ್ಲ.
ಅದೇ ರೀತಿ ತಂದೆ-ತಾಯಿಯಿಲ್ಲದೆ ಈ ಜಗತ್ತಿನಲ್ಲಿ ನಮ್ಮ ಬೆಳವಣಿಗೆ ಸಾಧ್ಯವಾಗುತ್ತಿರಲಿಲ್ಲ.
ತಾಯಿ ತನ್ನ ಎದೆಹಾಲು ಕುಡಿಸಿ ಜೋಗುಳ ಹಾಡುತ್ತಾ ಮಗುವನ್ನು ಬೆಳೆಸುತ್ತಾಳೆ. ತಂದೆ ತನ್ನ ಪರಿಶ್ರಮದಿಂದ ಮಕ್ಕಳ ಭವಿಷ್ಯ ಕಟ್ಟಲು ಪ್ರಯತ್ನಿಸುತ್ತಾನೆ. ಮಕ್ಕಳೇ, ಆ ಪ್ರೀತಿ ಮತ್ತು ತ್ಯಾಗವನ್ನು ಎಂದಿಗೂ ಮರೆಯಬೇಡಿ.
ಕೆಲವರು “ನಾವು ಈಗ ದೊಡ್ಡವರಾಗಿದ್ದೇವೆ, ನಮ್ಮ ದಾರಿಯನ್ನು ನಾವು ನೋಡಿಕೊಳ್ಳಬಹುದು” ಎಂದು ಯೋಚಿಸುತ್ತಾರೆ. ಆದರೆ ಒಂದು ಬಾರಿ ಹಿಂದೆ ತಿರುಗಿ ನೋಡಿದರೆ ನಮ್ಮ ಜೀವನದ ಪ್ರತಿಯೊಂದು ಹಂತದಲ್ಲೂ ತಂದೆ-ತಾಯಿಯ ಸಹಕಾರ ಮತ್ತು ಮಾರ್ಗದರ್ಶನ ಇದ್ದೇ ಇರುತ್ತದೆ ಎಂಬುದು ತಿಳಿಯುತ್ತದೆ.
ಇಂದಿನ ಸಮಾಜದಲ್ಲಿ ಕೆಲ ಸಂದರ್ಭಗಳಲ್ಲಿ ಮಕ್ಕಳಿಂದಾಗುವ ತಪ್ಪುಗಳು, ತಂದೆ-ತಾಯಿಯ ಮಾತುಗಳನ್ನು ಕಡೆಗಣಿಸುವ ಪ್ರವೃತ್ತಿ ಕಂಡುಬರುತ್ತಿದೆ. ಇದನ್ನು ತಿದ್ದಿಕೊಳ್ಳಬೇಕಾದ ಸಮಯ ಇದೇ. ತಂದೆ-ತಾಯಿಯ ಪ್ರೀತಿ, ಗುರುಗಳ ಉಪದೇಶ ಹಾಗೂ ಉತ್ತಮ ಸಂಸ್ಕಾರಗಳನ್ನು ಮನಸ್ಸಿನಲ್ಲಿ ಇಟ್ಟುಕೊಂಡು ಬದುಕಿದರೆ ಜೀವನದಲ್ಲಿ ಸರಿಯಾದ ದಾರಿ ದೊರೆಯುತ್ತದೆ.
ಗುರುವಿನ ಮಾರ್ಗದರ್ಶನದಲ್ಲಿ ಇರುವವರು ಜೀವನದಲ್ಲಿ ಸರಿ-ತಪ್ಪನ್ನು ಅರಿಯುವ ಜ್ಞಾನಿಗಳಾಗುತ್ತಾರೆ. ಆದರೆ ಆ ಮಾರ್ಗದರ್ಶನದಿಂದ ದೂರವಾಗುವವರು ಕೆಲವೊಮ್ಮೆ ತಪ್ಪು ದಾರಿಯಲ್ಲಿ ನಡೆಯುವ ಸಾಧ್ಯತೆ ಇರುತ್ತದೆ. ತಪ್ಪು ಮಾಡಿದ ನಂತರ ಅರಿಯುವುದಕ್ಕಿಂತ, ಮುಂಚಿತವಾಗಿಯೇ ಅರಿವಿನಿಂದ ನಡೆಯುವುದು ಒಳಿತು.
ಮಕ್ಕಳೇ, ತಂದೆ-ತಾಯಿಯ ಕನಸುಗಳನ್ನು ಗೌರವಿಸಿ, ಗುರುಗಳ ಮಾತುಗಳನ್ನು ಮಾನ್ಯಗೊಳಿಸಿ, ಉತ್ತಮ ಸಮಾಜ ನಿರ್ಮಾಣಕ್ಕೆ ನಿಮ್ಮ ಬದುಕನ್ನೇ ದಾರಿದೀಪವಾಗಿಸಿರಿ ಎಂಬುದೇ ಈ ಲೇಖನದ ಸಂದೇಶ.
ಲೇಖಕರು : ಸತೀಶ್ ಬಿ.ಜಿ.************************************
